Бахти сафед

Шеъри ман бӯи ту дорад,

Атри гесӯи ту дорад.

Мисраи пайвастаи ман

Ёди абрӯи ту дорад.

Ошиқи чашми туям, эй ҷони ҷони ҷони ман,

Беҳтарин, шевотарин, зеботарин армони ман.

Бе ту бахти ман ҷавон нест,

Шеърҳои ман равон нест.

Бе ҷаҳони ишқи покат

Ин ҷаҳон бар ман ҷаҳон нест.

Ошиқи чашми туям, эй ҷони ҷони ҷони ман,

Беҳтарин, рангинтарин, ширинтарин армони ман.

Аз ту ин рӯзи саидам,

Хандаи бахти сафедам.

Рӯи ту – рӯи саодат,

Чашми ту – чашми умедам.

Ошиқи чашми туям, эй ҷони ҷони ҷони ман,

Беҳтарин, олитарин, волотарин армони ман.